İrəvanın yeni siyasi kursu: SAHİBİNİ DƏYİŞİR...

Ermənistan üçün yeganə Avropayönlü seçim Türkiyədir”.
Bunu rusiyalı politoloq Fyodor Lukyanov deyib.

“İnteqrasiya məkanından fiziki baxımdan uzaq olan istənilən ölkə Avropa Birliyinə inteqrasiya edə bilməz. Bunu əvvəlki illərin təcrübəsi göstərir. Ermənistan üçün yeganə Avropa seçimi Türkiyə ola bilər. Bu, qonşu ölkədir və yeri gəlmişkən, AB-yə üzvlüyə namizəddir. Əgər bir neçə il əvvəl olsaydı, mən Türkiyə ilə əlaqələrin istənilən perspektivini istisna edərdim, lakin indi bunu deyə bilmirəm. Ona görə ki biz İrəvanın mövqeyinin necə kəskin dəyişdiyini görürük. Yəni tamamilə ağlasığmaz olan şey indi reallığa çevrilib. Qarabağdan imtina ölkədə heç bir silkələnmə yaratmadı. Ona görə də mən istisna etmirəm ki, avrointeqrasiya Türkiyə ilə münasibətlərin bərpası anlamına gələcək və bəlkə də daha çoxu olacaq”, – Lukyanov bildirib.

F. Lukyanovun fikirlərinə münasibət bildirən Müstəqil Mətbuat Mərkəzi" İctimai Birliyinin sədri, politoloq Elçin Xalidbəyli "Sherg.az"a vurğulayıb ki, Rusiya Ermənistanın Amerika Birləşmiş Ştatları və Qərbə yaxınlaşmasından ciddi şəkildə narahatdır:
“Ona görə də Rusiya siyasi dairələri və Kremlə yaxın olan politoloqlar Ermənistanı sözügedən məsələ ilə bağlı ciddi şəkildə tənqid edirlər. Ancaq önəmli məsələ ondan ibarətdir ki, Ermənistanın Rusiyadan uzaqlaşıb, Qərbə inteqrasiya etmə şansı sıfıra bərabərdir. Rusiyanı narahat edən tamamilə fərqli məsələdir. Ermənistan Qərbə iqtisadi və siyasi cəhətdən inteqrasiya olunmasa belə, rəsmi İrəvanın ərazisi Rusiyaya qarşı istifadə edilən hərbi poliqona çevrilə bilər. Amerika, Fransa və bəzi Qərb ölkələri Ermənistanın ərazisində bazalarının yaradılmasında maraqlıdırlar. Həmin hərbi bazaların Ermənistan üzərindən Cənubi Qafqazda yerləşdirilməsi Rusiyanın regiondakı maraqlarına zərbə vurardı. Yəni Rusiyanı narahat edən əsas məsələ də bundan ibarətdir. Qərbdə hesab edirlər ki, Ermənistan Avropa Birliyinə üzvlük üçün müraciət etməlidir və Aİ tərəfindən həmin müraciət qəbul olunmalıdır. Amma Ermənistan üçün Aİ-nın qapılarının nə vaxtsa açılması qətiyyən mümkün deyil. Sadəcə olaraq Qərb Ermənistanı Avropa Birliyinə üzvlüyə namizəd etməklə ömürlük öz təsir dairəsinə salmaq niyyətindədir. Ermənistan Aİ-na üzv olmaq üçün namizədliyini alacağı dəqdirdə rəsmi İrəvan ABŞ və Qərbin bütün sifarişlərini dərhal yerinə yetirmək məcburiyyətində qalacaq”.

Ekspert qeyd edib ki, Ermənistanın xilasının Qərbə inteqrasiyada olmadığını onlar anlamalıdırlar:
“Qərb, xüsusilə də Fransa Ermənistanı özünün yeni müstəmləkəsinə çevirmək istəyir. Yəni rəsmi Parisin dəstək çağırışları və oyunlarının arxasında Ermənistanı Fransanın yeni müstəmləkəsinə çevirmək niyyətləri gizlənir. Əgər Erməmistan Rusiyanın nəzarətindən çıxarsa, Fransanın müstəmləkəsinə çevriləcək. Ona görə də Ermənistan üçün yalnız iki xilas yolu mövcuddur. Türkiyə və Azərbaycanla münasibətləri normallaşdırıb, qarşılıqlı iqtisadi-ticari əlaqələri yoluna qoymaq Ermənistanın gələcək taleyini xilas edə bilər. Rəsmi İrəvan və Paşinyan hakimiyyəti bu varianta üstünlük verməkdən çəkinir. Halbuki zaman keçdikcə Ermənistan daha çox vaxt itirir. Azərbaycan və Türkiyə ilə əlaqələri normallaşdırmaq Ermənistanım dövlətçiliyinin xilas olmasında xüsusi rol oynayır”.

Tarix: 21-06-2024, 16:00 Oxunub: 144