Mais Məmmədov: Güclü ordu strategiyasının möhtəşəm nəticələri

Suraxanı Rayon Mənzil-Kommunal Təsərrüfatı Birliyinin rəisi Mais Məmmədov - Hər bir müstəqil dövlətin suverenliyinin, ərazi bütövlüyünün və xalqının təhlükəsizliyinin ən başda gələn qarantı onun sarsılmaz Silahlı Qüvvələridir. Azərbaycan xalqının tarixində elə müqəddəs tarixlər var ki, onlar sadəcə hərbi təqvim hadisəsi deyil, bütöv bir millətin şərəf, qətiyyət və ləyaqət simvoludur. 1918-ci il iyunun 26-da Azərbaycan Xalq Cümhuriyyəti tərəfindən ilk nizami hərbi hissənin - Əlahiddə Azərbaycan Korpusunun yaradılması ilə təməli qoyulan şanlı ordumuz, bu gün rəşadət və qüdrət zirvəsindədir. Milli həmrəyliyin təməl sütununa çevrilən, sıralarında minlərlə vətənpərvər insanı, fədakar fəalları və intellektual gəncliyi birləşdirən böyük siyasi ailəmizin hər bir üzvü keçirilən görüşlərdə ölkəmizin bu şərəfli hərbi-tarixi inkişaf yolunu böyük iftixarla təhlil edir, müstəqilliyimizin keşiyində duran ordumuzun qüdrətini gələcək nəsillərə aşılamağı özünə mənəvi borc bilir. Reallıq ondan ibarətdir ki, bu gün regionda və qlobal müstəvidə söz sahibi olan güclü dövlətin təməlində məhz qətiyyətli lider cəsarəti və müasir standartlara cavab verən ordu quruculuğu dayanır.
Azərbaycan Ordusunun müasir inkişaf mərhələsinə nəzər salarkən, bu böyük tarixi prosesin dahi rəhbər Heydər Əliyevin adı ilə qırılmaz tellərlə bağlı olduğunu görürük. Müstəqilliyimizin ilk illərində ölkədə hökm sürən daxili xaos, pərakəndəlik və vahid komandanlığın olmaması torpaqlarımızın itirilməsinə səbəb olmuşdu. Lakin 1993-cü ildə Ulu Öndərin xalqın təkidli tələbi ilə hakimiyyətə qayıdışından sonra ilk növbədə nizami ordu quruculuğuna start verildi. Pərakəndə silahlı dəstələr ləğv edildi, vahid rəsmi çağırış sistemi bərqərar olundu və mərkəzi komandanlığa tabe olan müntəzəm ordunun təməlləri möhkəmləndirildi. Məhz dahi rəhbərin 1998-ci ildə imzaladığı tarixi Fərmanla 26 iyunun Silahlı Qüvvələr Günü elan edilməsi, xalqımızda orduya olan inamı və milli ruhu yenidən dirçəltdi. Həmin illərdə əsası qoyulan möhkəm hərbi-strateji pərvazlar, Azərbaycanın gələcək tarixi qələbələrinin sarsılmaz zəmini oldu.
Ulu Öndərin siyasi və hərbi vəsiyyətlərini ən uca səviyyədə gerçəkləşdirən Müzəffər Ali Baş Komandan, Prezident İlham Əliyevin rəhbərliyi ilə Silahlı Qüvvələrimiz son iyirmi ildə dünyanın ən güclü orduları sırasına yüksəldi. Dövlətimizin iqtisadi müstəqilliyi və heç bir kənar maliyyə asılılığı olmadan formalaşdırdığı hərbi büdcəsi, ən müasir silah-sursat arsenalı, güclü yerli müdafiə sənayesi və ən əsası, yüksək daxili nizam-intizama malik kadr potensialı ordumuzu sarsılmaz bir gücə çevirdi. Bu daxili qüdrət və sarsılmaz milli həmrəylik 2020-ci ilin payızında cəmi 44 gün ərzində otuz illik işğala son qoyaraq parlaq Zəfər dastanını yazdı. Azərbaycan əsgəri və zabiti Ali Baş Komandanın əmri ilə şəhidlərimizin qanını yerdə qoymadı, Qarabağ və Şərqi Zəngəzurda üçrəngli müqəddəs bayrağımızı ucaltdı. Şanlı ordumuzun qətiyyətlə həyata keçirdiyi tarixi antiterror tədbirləri isə hərbi peşəkarlığımızı bütün dünyaya bir daha nümayiş etdirərək ölkəmizin suverenliyini bütün ərazilərimizdə tam və qəti şəkildə bərqərar etdi.
Bu gün işğaldan azad edilmiş, hər qarışı yenidən canlanan torpaqlarımızda Müdafiə Nazirliyinin ən müasir hərbi hissələrinin, komando briqadalarının yaradılması və sərhədlərimizin etibarlı şəkildə qorunması qurtuluş fəlsəfəmizin və milli tərəqqimizin ən canlı sübutudur. Azərbaycan artıq təkcə öz sərhədlərini sığortalayan deyil, regionda sülhün, daxili sabitliyin və qlobal nəqliyyat-enerji dəhlizlərinin təhlükəsizliyini təkbaşına təmin edən qüdrətli bir regional liderdir. Biz fəaliyyətimizin hər bir mərhələsində bu böyük irsə sadiq qalaraq, dövlətimizin hərbi-siyasi qüdrətinin güclənməsi, milli maraqlarımızın qorunması və gənclərimizin vətənpərvərlik ruhunda tərbiyə olunması naminə cənab Prezidentin rəhbərliyi ilə həyata keçirilən bütün strateji hədəflərə fəal dəstək verməyi özümüzə ən ali, müqəddəs vəzifə hesab edirik.

Tarix: Dünən, 23:57 Oxunub: 8